ချားလ်ဘူကောစကီးဆေးရုံ

ဂစ်တာသမားဖြစ်ချင်တဲ့ ကျောင်းသားရယ်
ဗိုလ်အောင်ဒင်ဇာတ်လမ်းကိုအလွတ်ရတဲ့ ဆေးသမားရယ်
အရက်ဖြတ်တဲ့ ကဗျာဆရာရယ်
စိတ်ကျန်းမာရေးဆေးရုံမှာ
ညစာအတူစားကြရင်း
ကိတ်မုန့်အကြောင်းစကားပြောကြတယ်

ကိတ်မုန့်ဟာ လူမှန်ရင်မစားသင့်ကြောင်း
ကိတ်မုန့်ထက် ပေါင်မုန့်ကိုသာစားသင့်ကြောင်း
ကိတ်မုန့်မှာ အတွေးအခေါ်မရှိကြောင်း
ပေါင်မုန့်ဟာ တော်လှန်ရေးတစ်ရပ်ဖြစ်ကြောင်း
ပေါင်မုန့်ဟာ လူသားဆန်ကြောင်း
ကိတ်မုန့်ဟာ လူတွေရဲ့ခံစားချက်ကိုနားမလည်ကြောင်း

မီးနဲ့ဖုတ်ရတာချင်းအတူတူ
ကိတ်မုန့်နဲ့ပေါင်မုန့်ကို သွေးအမျိုးအစားခွဲခြားကြတယ်

ချောကလက်ကိတ်ဟာ မင်းစိုးရာဇာဆိုရင်
ပေါင်မုန့်အကြမ်းစားဟာ အလုပ်သမားလူတန်းစားပဲ

ဂစ်တာတစ်လက်ဟာ
ဂျုံစိုက်ခင်းတွေပဲ

ဗိုလ်အောင်ဒင်ဟာ
မမြဝင်းကို သိပ်ချစ်တာပဲ

ချားလ်ဘူကောစကီးဟာ
အရူးပဲ

ဂစ်တာတစ်လက်ရဲ့သွေးပေါင်ဟာ
အောက်သွေးကျနေတယ်

ဗိုလ်အောင်ဒင်ရဲ့သွေးပါင်ဟာ
အပေါ်သွေးတက်နေတယ်

ချားလ်ဘူကောစကီးရဲ့သွေးပေါင်ဟာ
ပုံမှန်ပဲ

အထူးကုဆရာဝန်ကြီးက သူ့မွေးနေ့အတွက်
လူနာတွေကို ကြက်ဥပြုတ်နဲ့နွားနို့တစ်ခွက်စီတိုက်ကျွေးတယ်

ကျောင်းသားက ဂစ်တာတီးပြ
ကဗျာဆရာက ချားလ်ဘူကောာစကီးကဗျာတွေရွတ်ပြ
ဆေးသမားက ငိုကြွေးပြ

ဆေးရုံဟာ
ပျော်စရာကောင်းတယ်
ဆရာဝန်ဲကြီးကျန်းမာပါစေလို့ သူတို့ဆုတောင်းကြတယ်။

ကြည်ဇော်အေး
16 feb 2020