ေရာက္တတ္ရာရာ ပန္းဆိုးတန္း
ေန႔လယ္က်ရင္
ၿမိဳ႕ထဲဘက္ သြားမယ္
ၿမိဳ႕ထဲေရာက္ရင္
ပန္းဆိုးတန္းဘက္သြားမယ္
ပန္းဆိုးတန္းေရာက္ရင္
မၾကာခင္ ပိတ္ေတာ့မယ့္
စူပါကင္းမွာ ထိုင္မယ္
စားပြဲဆီ စားပြဲထိုးကေလးေတြ လာရင္
က်ဆိမ့္ကို သတိရၿပီး
ေပါ့ဆိမ့္ တစ္ခြက္ မွာမယ္
လက္ဘက္ရည္ေရာက္လာရင္
ေရေႏြး ငွဲ႕မယ္
ေရေႏြး ငွဲ႕ၿပီးရင္
လက္ဘက္ရည္ ေသာက္မယ္
လက္ဘက္ရည္ေသာက္ၿပီးရင္
တေက်ာ့ႏွေက်ာ့ကိစၥေတြ ၾကည့္မယ္
ၾကည့္ၿပီးရင္ ေမ့မယ္
ေမ့ၿပီးရင္ သတိရမယ္
သတိရၿပီးရင္လည္း
ျပန္ေမ့ၾကတာေပါ့
မင္းဘယ္သူလဲ
ငါ ဘယ္သူလဲ
မင္းမရွိ ငါမရွိ
အားလံုး ဘယ္သူမွမရွိ ဆိုတဲ့
သီခ်င္းစာသားကို
သံစဥ္နဲ႔အတူ ညည္းမိမယ္
ၿပီးရင္ ပိုက္ဆံ ရွင္းမယ္
ျပန္အမ္းေငြေစာင့္မယ္
ျပန္အမ္းေငြေစာင့္ရင္း
အိမ္ျပန္ဖို႔ သတိရမယ္
သတိရတာနဲ႔
ေဟး လို႔ တစ္ေယာက္ေယာက္ကို
လွမ္းသတိေပးလိုက္မယ္
မင္းေရာ မျပန္ေသးဘူးလား
ငါေရာ မျပန္ေသးဘူးလား
ပန္းဆိုးတန္းဟာ
ေနဝင္ရင္ ပိုလွတယ္ ဆိုလား
မိုးေဝး
၂၅-၆-၂၀၁၉
[unicode]
ရောက်တတ်ရာရာ ပန်းဆိုးတန်း
နေ့လယ်ကျရင်
မြို့ထဲဘက် သွားမယ်
မြို့ထဲရောက်ရင်
ပန်းဆိုးတန်းဘက်သွားမယ်
ပန်းဆိုးတန်းရောက်ရင်
မကြာခင် ပိတ်တော့မယ့်
စူပါကင်းမှာ ထိုင်မယ်
စားပွဲဆီ စားပွဲထိုးကလေးတွေ လာရင်
ကျဆိမ့်ကို သတိရပြီး
ပေါ့ဆိမ့် တစ်ခွက် မှာမယ်
လက်ဘက်ရည်ရောက်လာရင်
ရေနွေး ငှဲ့မယ်
ရေနွေး ငှဲ့ပြီးရင်
လက်ဘက်ရည် သောက်မယ်
လက်ဘက်ရည်သောက်ပြီးရင်
တကျော့နှကျော့ကိစ္စတွေ ကြည့်မယ်
ကြည့်ပြီးရင် မေ့မယ်
မေ့ပြီးရင် သတိရမယ်
သတိရပြီးရင်လည်း
ပြန်မေ့ကြတာပေါ့
မင်းဘယ်သူလဲ
ငါ ဘယ်သူလဲ
မင်းမရှိ ငါမရှိ
အားလုံး ဘယ်သူမှမရှိ ဆိုတဲ့
သီချင်းစာသားကို
သံစဉ်နဲ့အတူ ညည်းမိမယ်
ပြီးရင် ပိုက်ဆံ ရှင်းမယ်
ပြန်အမ်းငွေစောင့်မယ်
ပြန်အမ်းငွေစောင့်ရင်း
အိမ်ပြန်ဖို့ သတိရမယ်
သတိရတာနဲ့
ဟေး လို့ တစ်ယောက်ယောက်ကို
လှမ်းသတိပေးလိုက်မယ်
မင်းရော မပြန်သေးဘူးလား
ငါရော မပြန်သေးဘူးလား
ပန်းဆိုးတန်းဟာ
နေဝင်ရင် ပိုလှတယ် ဆိုလား
မိုးဝေး
၂၅-၆-၂၀၁၉
Labels: မိုးေဝး
posted by D Wathone Khat @ June 26, 2019
0 Comments
0 Comments:
Post a Comment
Subscribe to Post Comments [Atom]
<< Home