မြေအောက်လှုပ်ရှားမှုသမိုင်း
ယဉ်ကျေးမှုအရဆိုတော့ ယဉ်ကျေးမှုအဖြစ်
ပန်းသီး လိမ္မော်သီး
ကိတ်မုန့် ပေါင်မုန့်
ဆိတ်သားခြောက်တွေ လက်ဆောင်ရတယ်
ယဉ်ကျေးမှုတော်လှန်ရေးအဖြစ်
ဆိုက်ကယ်ဒဲလစ်သီချင်းပြင်းပြင်းတွေ နားထောင်တယ်
လူကအကောင်း
ရူးချင်ယောင်ဆောင်တယ်
အရူးလိုင်စင်ရတယ်
မူးယစ်ဆေးသုံးစွဲခွင့်ရပြီ
ပြောချင်တာပြောခွင့်ရပြီ
ဘာကိုမှ မယုံကြည်
ဘာကိုမှ မကိုးကွယ်
လွတ်လပ်ရေးကြေညာစာတမ်းကို
ကိုယ်တိုင်ရေးမယ်
အာဏာဟာ
ကဗျာက စရမယ်
ဥပေဒဟာ
ကဗျာနဲ့ အဆုံးအဖြတ်ပေးရမယ်
နိုင်ငံတော်သီချင်းဟာ
ရော့ခ်သီချင်းဖြစ်ရမယ်
နိုင်ငံတော်အလံဟာ
ဂျက်ဆန်ပူးလော့ပန်းချီကားလိုဖြစ်နေရမယ်
နိုင်ငံတော်သမ္မတကို
အရူးလက်မှတ်ရထားသူတွေကသာ ရွေးချယ်တင်မြောက်ခွင့်ရှိရမယ်
နိုင်ငံသားတိုင်းဟာ
နေ့မှာ အိပ်ရမယ်
ညမှာ အလုပ်လုပ်ရမယ်
နိုင်ငံသားတိုင်းဟာ
စိတ်ကူးယဉ်မှုအတွက် အခွန်ဆောင်ရမယ်
နိုင်ငံသားတိုင်းဟာ
နျူကလိယားလက်နက်တစ်ခုစီပိုင်ဆိုင်ခွင့်ရှိရမယ်
အာဟာရပြည့်ဝဖို့အတွက်
နေ့စဉ် ကျည်ဆံတွေဖြည့်နေရမယ်
နေ့စဉ် စစ်ဖြစ်နေရမယ်။
ကြည်ဇော်အေး
19 feb 2020
Labels: ၾကည္ေဇာ္ေအး
posted by D Wathone Khat @ February 23, 2020
0 Comments
0 Comments:
Post a Comment
Subscribe to Post Comments [Atom]
<< Home