သဘာဝပတ်ဝန်းကျင်ထိမ်းသိမ်းရေးစီမံကိန်း

ရေပိုက်ပြင်သမားဟာ ရေပိုက်ခေါင်းတွေလိုက်စစ်ရင်း
အရိုးတွေကိုတွေကိုတွေ့ရတယ်
လူရိုးတွေ

မြေကြီးအောက်မှာတွေ့ရမယ့် လူ့အရိုးတွေဟာ
ဘာလို့ရေပိုက်လိုင်းထဲမှာတွေ့ရတာလဲ

ဘယ်ခုနှစ်ကအရိုးလဲ
စစ်ဆေးကြတယ်

အဖြေက
အရိုးတွေက လတ်လတ်ဆတ်ဆတ်ပဲ
အသားစလက်ကျန်တွေတောင် ကပ်ကျန်နေသေးတယ်

သူ့ကိုဖမ်းဆီးမိတော့
လူသားဟာသိပ်အရသာရှိသတဲ့
လူသားတိုင်းဟာ လူသားစားသင့်သတဲ့
လူသားတွေ
မျိုးတုံးပျောက်ကွယ်သွားသည်အထိစားသင့်သတဲ့

လူတွေဟာ ယဉ်ကျေးလေလေ
စားကောင်းလေလေပဲတဲ့

ပညာတတ်လေလေ
အရသာပိုရှိလေလေပဲတဲ့

အဖြေက သွေးအေးတယ်
မေးခွန်းက သွေးအားနဲနေတယ်

လူသားဟာတွေးခေါ်တယ်
ကိုးကွယ်တယ်
ဥပဒေစည်းမျဉ်းတွေရေးဆွဲတယ်

ကျောင်းတွေဆောက်တယ်
ဆေးရုံတွေဆောက်တယ်
စက်ရုံတွေဆောက်တယ်
ထောင်တွေဆောက်တယ်

လူသားဟာ အဟာရမဖြစ်တဲ့
အသားစားသတ္တဝါတွေပဲ
လူတွေဟာ လူသားပဲစားကြရင်
ကျွန်တော်လို ရေပိုက်ပြင်သမားတွေလည်းမလိုအပ်
ခင်ဗျားတို့ ရဲတွေလည်းအလုပ်မရှုပ်တော့ဘူးတဲ့

ဒီအာကာသထဲမှာ
ကမ္ဘာဂြိုလ်ဟာ ကျွတ်ကျွတ်အိပ်လိုအမှိုက်တစ်စပဲလို့
ရေပိုက်ပြင်သမားက
စစ်ကြောရေးစခန်းမှာဖြေတယ်

သူ့လိပ်စာက
ခင်ဗျားအိမ်ဘေးမှာပဲ သူနေထိုင်ပါတယ် တဲ့။

ကြည်ဇော်အေး
18 feb 2020