လွတ်လမ်း

JANUARY 9, 2016 PUBLIC
(၁)
အခန်းထဲမှာ ပန်ကာမပိတ်ခဲ့ရဘူး။ သီချင်းတွေလည်း အကျယ်ကြီးဖွင့်ခဲ့တယ်။ ခြေသံတွေလုံခဲ့ပြန်ရော။ ထသွားထလာလျှောက်ထွက်လာလိုက်ရုံ။ လေကြောင်းသင့်ရာမှာ ခေါင်းလောင်းသေးသေးလေးတွေ စက်ဝိုင်းပတ် လည်ရစ်ခဲ့မှာပေါ့။ မလျှော်ရသေးတဲ့ အ၀တ်တွေရောပဲ။ အချဉ်ဖောက်ထားတဲ့ အနွေးထည်ထဲနှိုက်ထားတဲ့ လက်တွေပဲအတူပါလာတယ်။ ဘာလို့အိပ်ချိန်တွေရှိနေပြီး ရောက်လာရတာလဲ။ အညောင်းပြေတယ်ပဲရှိတယ်။ အညာပြေတယ်မရှိဘူး။ လေကိုနွှင်ရင်းထွက်လာဖြစ်ခဲ့ပြီပဲ။
(၂)
လမ်းလျှောက်ထွက်လာတဲ့ တစ်ဖက်အ်ိမ်က လင်မယားကိုနှုတ်ဆက်ဖို့ ပါးစပ်ဖျားတင် ပထမဆုံးတစ်ကြောင်းကို နောက်ဆုံးစာပိုဒ်အဖြစ်စာစီတယ်။ “နှင်းတွေအရမ်းကျတာပဲ”။ တစ်ဖက်က ပြန်နှုတ်ဆက်သံမကြားရခင် မြင်ယောင်မိသမျှတော့ သူတို့ခေါင်းတွေအငွေ့တထောင်းထောင်း ပြတ်ကျကျန်ခဲ့မှာ။ စကားစမြည်ပြောနေဖို့ အချိန်ကောင်းမဟုတ်ဘူး။ ဓာတ်မီးတိုင်တွေရဲ့ စွမ်းအင်အရင်းအမြစ်က ဟောဟိုနောက်က ခဲဖျော့ဖျော့ တလိပ်လိပ်တိမ်တွေလား။ ဘ၀ရဲ့ အနှစ်ချုပ်က လမ်းလျှောက်ခြင်းလားပဲ။ သစ်ပင်တိုင်းမြင်လိုက်ရရင် သစ်ရွက်တွေမကြွေချင့် ကြွေချင်။ မြူတွေက ခေတ်ကာလကို ပိတ်ဆို့ထားတဲ့ လက်သည်တရားခံလား။
(၃)
အိမ်သာတစ်ခုအမြန်ရှာရမယ်။ တွေ့ကရာစတိုးဆိုင်ထဲ ၀င်လို့မဖြစ်ဘူး။ လက်မထောင်ရင်း လျှောက်လာတော့မှ အလင်းရောင်မှာ တောက်လက်နေတဲ့ လက်သည်းတွေညှပ်ဖို့။ သတိထားမိတယ်။ သတိရတာက သတိရတာပဲ။ အခုလောလောဆယ်တော့ ရောက်နေကျလမ်းပဲ။ ည က အိပ်ရာဝင်နောက်ကျတယ်။ မိုင်တိုင်ဆယ်ခုသာသာ ကျန်ရစ်ခဲ့ရောပေါ့။ မနက်လင်းပြီဆိုတာ မသိသာဘဲ မနေဘူး။ ကျောက်မီးသွေးရထားတွေက ရေနွေးငွေ့ဝမ်းဗိုက်သားတွေနဲ့ သံလမ်းကို အထိုက်အလျောက်ဖြတ်ခဲ့မယ်။ သားသတ်ရုံဆီ တွားသွားနေတဲ့ အတိတ်ကာလပြပုဒ်ပဲ။ လာရာလမ်းကို ပြန်ငဲ့ကြည့်တော့ အခန်းထဲမှာ ပန်ကာ ပိတ်ခဲ့လား ၊ မပိတ်ခဲ့လား။
(၄)
ကိုယ်ကအေးရင်ပျော်တယ်။ လတ်တလော ငြီးငွေ့ နေမိတာ အမှန်ပဲ။ အကျွတ်တရားလို့မဆိုလို။
(၅)
တံခါးလည်း ပြန်မစေ့ခဲ့မိ။ အေးရော။ စီးလာတဲ့ဖိနပ်က ခြေချောင်းအပေါက်တွေ ချောင်းချောင်းကြည့်တာ မြင်နေရတယ်။ အသက်ရှူလိုက်တိုင်း လေထက်သိပ်သည်းတဲ့ ချွေးနံ့ဝင်ဝင်လာတယ်။ မနက်စာ စားသင့်နေပြီ။ အိတ်ထဲမှာ စိတ်ပဲပါတယ်။ စိတ်တိုင်းကျတစ်နေရာရာ ရောက်သွားမှဖြစ်မယ်။ အကြွေစေ့တွေကရော ကူညီရာရောက်ပါ့မလား။ ဖျက်သိမ်းထားတဲ့ ငွေစက္ကူတွေ အလိုအလျောက် စုဆောင်းနေမိတာ အကျင့်ကြီးကိုပါလို့။ ရှဥ့်မိသားစုလမ်းပေါ်တက်ဆော့နေကြတယ်။ ကားအသွားအလာ ကျဲပါးစပြုလာပြီ။ အော်ဟစ်နောက်ပြောင်နေတဲ့ ကွင်းပြင်စိမ်းစိမ်းထဲက စာခြောက်ရုပ်တွေလား၊ ဒေသခံတွေလား။ ဘာမှကို ကြိုပြင်ဆင်ထားတာမျိုးမရှိဘူး။ ည၀တ်အင်္ကျီတောင် မဖြစ်မနေလဲခဲ့တာမလား။ ထမင်းစားစားပွဲမှာ အရင်းအတိုင်း ပန်းကန်ပြားတွေ။
(၆)
ဖိနပ်သံပြန်မကြားရတော့ဘူး။ ဆံပင်တွေအရှည်မြန်လာတယ်။ မကောင်းတတ်လို့ ထားရစ်ခဲ့တဲ့ စိတ်ပူနေမှာစိုးလိုတဲ့ စာတစ်စောင်ရယ်။ “အထူးတလည်တော့ မဟုတ်ပါဘူး ၊ ကိုယ်ထွက်သွားတော့မယ်”။ ပန်ကာမပိတ်ခဲ့တာ သေချာလား။ မီးဖိုချောင်ရဲ့ ခေါင်းတိုင်တစ်ခုမှာ ညှော်နံ့တချို့ အရည်ပျော်ကျနေတယ်။ ဓာတ်ကြိုးတန်းရဲ့ မလှမ်းမကမ်းတိုင်းမှာ အမျိုးအမည်မသိငှက်တွေနားနေသလိုပဲ။ မျက်လုံးတွေဆူလာတယ်။ အဲဒီငှက်တွေကို မြင်းကျားတွေလို့ အရောင်နဲ့နာမည်ပေးမယ်။ လမ်းဆုံလမ်းခွက ပန်ကာပြန်ပိတ်ဖို့ သင့်မသင့်တွေးမိစေသလား။ ဟုတ်တိပတ်တိ အနွေးဓာတ်ရလာတော့ ဖိနပ်တွေကို ကန်ထုတ်လိုက်ပြီ။ ခြေအိတ်တွေ အနံ့မထွက်တဲ့ရာသီ။ လမ်းရဲ့ အဆက်အဆံက ပုံပြောင်းသွားတယ်။ ဒါပေမဲ့ ဘယ်တော့ဆုံးမလဲ။ ရပ်ဖြစ်မှ သိမယ်။
(၇)
ဒီဘက်ကတောင်တန်းတွေဟာ မြေပုံမှာ ဘယ်လိုမို့မောက်မလဲ။ ဖိနပ်ချွတ်မီးလုံးပျက်နေတာရယ်။ အသေးစား အပြောင်းအလဲတစ်ခုရယ်။ နေ့တွေထပ်နေတယ်။ နေ၀င်ပြီး မိုးချုပ်။ မီးလည်းမငြိမ်းတဲ့ အနမ်းတွေ။ စ ခြေချမိခါစတော့ သက်တောင့်သက်သာပဲ။ စီးနေကျဘတ်စ်က ဒီဘက်ကဖြတ်မယ်။ မထင်ဘူး။ ရောက်ရာ ဓာတ်တိုင်က စောင့်ဖို့ အဓိပ္ပာယ်တစ်ခုလိုတယ်။ အမောဖြေမယ်။ အနားယူမယ်။ ဘာကိုမှ စောင့်နေတာမျိုးမဟုတ်ဘဲ အသက်ရှူနှုန်းကို ညှိယူမယ်။ ဒီလောက်ပဲ။ လူပျောက်ကြော်ငြာမထည့်ဖို့။ မှာဖို့ မေ့ခဲ့တယ်။ ပူဆွေးသောကကို နာရီအပိုင်းအခြားနဲ့ သတိပေးနေသလိုမျိုးပါပဲ။ အနားရသွားတဲ့ လစဉ်ထုတ်မဂ္ဂဇင်းကို အိမ်တိုင်ရာရောက် ပေါက်ချလာမှာကို စောင့်နေမိတာမျိုး။ လမ်းဆုံတွေ ပိုပိုများလာပြီး လာရာလမ်းကို အကြောင်းမဲ့ မှတ်မိနေသေးတာ။ မျက်မှန်းတန်းမိဖို့ မိုင်တွေအများကြီးလည်း မလိုလှဘူး။ အမှတ်သညာတည့်တည့် ရပ်နေမိတယ်။ မဟုတ်ဘူး။ လူတစ်ယောက်ရဲ့ နာမည်လို့ ထင်ရတဲ့ အသံထွက်တစ်ခုကို အော်ဟစ်ပြီး မြေတွင်းထဲ ခုန်ဆင်းဖို့ကြိုးစားနေတဲ့ သက်ရှိထင်ရှားလူတစ်ယောက်ကို ဆွဲလားရမ်းလားလုပ်နေတဲ့ လူတစ်စုရဲ့ ကောက်ရိုးကြွက်ကိုက် ဈာပန။
(၈)
လက်မကတော့ အခုအချိန်ထောင်ထားတုန်းပဲ။ တစ်စီးတစ်လေတော့ လမ်းကြုံကောင်းပါရဲ့။ နေ၀င်သွားခဲ့တာ ပန်ကာမပိတ်ခဲ့လို့လား။ မဟုတ်ရင် လမ်းဘေးတစ်နေရာမှာ ခြေပစ်လက်ပစ် အိပ်ရာဝင်လိုက်မိတော့မယ်။ မြေကြီးနဲ့ကျောချင်းကပ်ထားလိုက်တယ်။ ပြီးတော့ ကောင်းကင်က အကန့်အသတ်ရှိတယ်။ “လိုက်မှာလား”။
(၉)
ဘယ်ဘက်ကိုသွားမှန်း မသိရတဲ့ ကားတစ်စီးဆီက တံခါးပိတ်ပြီးတာနဲ့ လမ်းက တမျှော်တခေါ် တိတ်ဆိတ်သွားတော့မယ်။ရှဥ့်တွေအိမ်ပြန်ကြတယ်။ နေလုံးကြီးရောပဲ။ လရောင်က မီးမထွန်းထားတဲ့အိမ်ကို တံခါးတိုးတိုးခေါက်ပါ။ လမ်းရဲ့အဆုံးမှာရှိနေတဲ့ ဓာတ်တိုင်က ပထမဆုံးသက်ဦးမဟုတ်ဘူး။ လမ်းကဘယ်ကို ဘယ်လို လမ်းကြုံလိုက်မလဲပေ့ါ။ ရောက်ရာပေါက်ရာလေတွေ အတိုက်ကြမ်းတဲ့နေ့က …
“ထွက်ခွာတယ်ဆိုတာ လူတွေရဲ့အလုပ်တွေထဲကတစ်ခုပဲ
ယောက်ျားမိန်းမအလုပ်မဟုတ်ဘူး”
အရှေ့အနောက်ချွန်မြနေတဲ့ သံပြားဆိုင်းဘုတ်ရဲ့
ကြက်ခြေခတ်ပုံစံနဲ့
“လမ်းဆုံမှာ လမ်းမဆုံးပါ
ထို့အတူ လမ်းဆုံးမှာ လမ်းမဆုံပါ”
တောင်မြောက်ကပ်ထားတဲ့ နံရံကပ် မော်တယ်ကြော်ငြာ။
အိမ်ပြန်ရောက်ပါပြီလား။ ။

-ကောက်ကွေ့