ပင်လယ်ရေဒီယို

ကျွန်တော်ကမ်းခြေမှာထိုင်နေတုန်း ရေထဲကနေ
ရေဒီယိုတစ်လုံးထွက်ပေါ်လာတယ်
သူ့စပီကာအပေါက်တွေကနေ ကျွန်တော့်မျက်နှာဆီ
သဲတွေ တရှူးရှုးမှုတ်ထုတ်တယ်
မျက်လုံးထဲဝင်မှာစိုးလို့ ကျွန်တော်လက်နဲ့ကာလိုက်တယ်
လက်ကိုပြန်ချလိုက်တော့ ဘေးနားမှာ
ကိုလံဘတ်ရောက်နေပါတယ်
သူက သံပခြုပ်သောက်ရင်း မိန်းမမယူဖို့ပြောတယ်
ပြီးတော့ ရေနဂါးအခြောက်တွေထည့်လိပ်ထားတဲ့ ဆေးပေါ့လိပ်ကို ဖွာတယ်
မီးခိုးမှုတ်ထုတ်လိုက်တော့ မုန်တိုင်းအသေးစားဖြစ်သွားတယ်
သူက သူ့ခရီးစဉ်အကြောင်း စားမြုံပြန်တယ်
ရွှေတွေမရခဲ့ကြောင်း ၊ ကျွန်တွေပဲ ရခဲ့ကြောင်း
သူ့သင်္ဘောသားတွေ ငါးလိပ်ကျောက်တွေနဲ့ လက်ထပ်သွားကြောင်းပြောတယ်
အဲ့ဒီအချိန် ပင်လယ်ထဲက မုဒ်ဦးတစ်ခုပေါ်လာသေးတယ်
မုဒ်ဦးအစွန်းမှာ ပါးဟက်ပါတဲ့ နတ်သမီးအတိုအထွာတွေ အများကြီးကပ်ပါလာသေးတယ်
ချွဲကျိနေတဲ့နတ်သမီးတွေကို မြင်ရတာ ရွံစရာကောင်းတယ်
ကျွန်တော်တံတွေးထွေးလိုက်တော့ မုဒ်ဦးဟာ ရေအောက်ထဲ ပြန်ဝင်သွားတယ်
ကိုလံဘတ်က တစ်ခုခုပြောဖို့ပြင်တဲ့အချိန် ကျွန်တော်က ဖြတ်ပြောလိုက်တယ်
အစကတည်းက စကားကို ရှင်းရှင်းပြောထားချင်တဲ့သဘောပါ
“ ကျွန်တော်ခင်ဗျားထက် ဗာစကိုဒဂါးမားကို ကြိုက်တာ ”
ဝိညာဉ်သဘောင်္တွေကြောင့်လားတဲ့ သူက အဲ့ဒီလိုတော့ပြန်ပြောတယ်
ရေမြှုပ်တွေများစွာ ရေပြင်ပေါ်လာကြတယ်
ရေမြှုပ်တွေပေါက်ကွဲသွားတော့ ကျယ်လောင်တဲ့ ဗုံသံထွက်ပေါ်တယ်
ဗုံသံတွေ ငြိမ်သွားတော့ ကိုလံဘတ်က နီနာနဲ့ ပင်တာ လို့ အမှတ်တမဲ့ရေရွတ်တယ်
ပြီးတော့ သူ့မျက်လုံးနှစ်ဘက်က ဒေသထွက်ကုန်တွေ စီးဆင်းလာတယ်
ငါငိုသွားလား လို့ ကျွန်တော့်ကို သူမေးတယ်
ကျွန်တော်က ‘မငိုပါဘူး’ လို့ဖြေလိုက်တယ်
နီနာနဲ့ပင်တာဆိုတာ သူ့မိန်းမနှစ်ယောက်ရဲ့အမည်မဟုတ်ပါဘူး
သူရဲ့ သီးခြားအသုံးဝင်မှုကိုယ်စီရှိတဲ့ သင်္ဘောနှစ်စီးရဲ့ အမည်ပါ
ဒါပေမယ့် အဲ့ဒီသဘောင်္တွေကလည်း ညယံကမ်းကပ်ချိန်ဆို
မိန်းမတွေဖြစ်ပြီး ကုန်းပေါ်တက်လာတယ် ကိုလံဘတ်နဲ့ကုတင်ပေါ်တက်အိပ်တယ်
သံလိုက်အိမ်မြှောင် ဆယ့်ငါးလုံးလောက်တောင်မွေးသေးတယ်လို့ ကျွန်တော်ထင်တယ်
သူ ပင်လယ်ကို ခံစားမှုပါပါငေးကြည့်ရင်း မျက်ခမ်းတွေ လှုပ်နေတယ်
အဲ့ဒီအချိန် ရေအောက်ထဲက ခုနမုဒ်ဦးထွက်လာပြန်တယ်
မုဒ်ဦးအမိုးမှာ ပြွတ်သိပ်နေတဲ့ နတ်သမီးတွေကို ကိုလံဘတ်က
လက်ခလယ်ထောင်ပြပြီး အီတလီလိုလည်း အသံထွက်ဆဲလိုက်တယ်
ပြီးတော့ ကျွန်တော့်ကိုမေးတယ် ‘ ငါရိုင်းသွားလား’ တဲ့
ကျွန်တော်ခေါင်းခါပြီး ‘ သာမာန်ပါပဲ ’ လို့ ဖြေလိုက်တယ်
ကိုလံဘတ်ဟာ ပြန်တော့မယ်ဆိုပြီး မုဒ်ဦးဆီ လျှောက်သွားတယ်
မုဒ်ဦးနဲ့အတူ ရေအောက်ထဲ မြုပ်ပြီးပျောက်သွားတယ်
နေဟာ ပင်လယ်ထဲ တရှဲရှဲဝင်နေတယ်
နေလုံးနဲ့ထိပြီး စင်ရော်တွေ လင်းနို့ဖြစ်သွားသေးတယ်
ရေအောက်ထဲကလည်း ရေဒီယိုက ထွက်လာပြီး
အိမ်ပြန်မယ်လေလို့ မိန်းမအသံနဲ့ ပြောတယ်
ကျွန်တော် ခေါင်းညိတ်ပြလိုက်ပါတယ် ။

- သူဝေး -