ဝင်သွားတဲ့ လနောက်ကို

ကျေးလက်လမ်းတစ်ခုပေါ်မှာ
သူတို့ မူးယစ်နေကြတယ်။

ဆိုင်ကယ်က လဲလို့
တစ်ယောက်က ထိုင်ပြီး ဂိမ်းဆော့လို့
တစ်ယောက်က ဘီယာဗူးကိုင်လို့
တစ်ယောက်က အော်ဟစ်လို့။

လရောင်မှုန်မှုန် လမ်းပေါ်မှာ
ကောင်လေးတွေ
သူတို့ ဆက်သွားကြမလို့လား
သူတို့ ဒီကိုပဲ လာခဲ့တာလား။

အနောက်ကို လက ဝင်ခဲ့ပြီ
အမှောင်ရိပ် ကြီးစိုးလာတယ်။

သူတို့ မသွားကြတော့ဘူးလား
မိုးလင်းမှ သွားမှာလား
သူတို့ သွားစရာ ရှိသလား။

အဝေး အလှူအိမ်က ဆိုင်းသံတိတ်သွားပြီ
သူတို့လည်း အိပ်ကုန်ပြီ။

ညီမွန်
၈.၂.၂၀၂၀