အချစ်က နှလုံးသားနဲ့ မဆံ့ဘူး

အကြည့်က မျက်လုံးနဲ့ မဆံ့ဘူး
မျက်လုံးလေးမှေး အပြုံးလေးကို စ
ဆံဖျားမှသည် ခြေသည်းဖျားအထိ
မင်းကို ကြည့်လို့မဝ
မင့်ကို ငါပဲ မြင်တဲ့ တစ္ဆေဖြစ်စေချင်မိရဲ့။

အိပ်မက်က ညနဲ့ မဆံ့ဘူး
ခြောက်ကမ်းပါးကြီး ခြားထားတယ်ဆိုတဲ့
အိပ်မက်ဟာ တစ်ညနဲ့ မဆုံး
ညများစွာ ဆက်မက်လို့။

အချစ်က နှလုံးသားနဲ့ မဆံ့ဘူး
လက်သီးဆုပ်အရွယ် နှလုံးသားလေးဟာ
ဘယ်လို လေးလံတဲ့ ဝန်ကို ထမ်းရသလဲ
မီးရှူးတစ်ခုလို ပေါက်ကွဲသွားတဲ့ ပျော်ရွှင်မှုတွေ
လှိုင်းပေါ်က လှေလို ကြည်နူးမှုတွေ
မြေအောက်လှိုင်ခေါင်းထဲက ညလို သံသယတွေ
နှလုံးသာဟာ လေတင်းနေတဲ့ ပူစီဖောင်းပမာ။

အလွမ်းက ဘဝနဲ့ မဆံ့ဘူး
သံသရာလို ရှည်လျားပြီး
နောက်ဆုံးထွက်သက်လို အနမ်းကို ရပ်တန့်
သံသာလေကမ်းမှာ
ငါတို့အနမ်းတွေ ပြန်ဆုံကြမှာလားဆိုတာအထိ
ညို့လာတဲ့ မိုးသားတွေ
ကောင်းကင်နဲ့ မဆံ့တော့ဘူး။

ညီမွန်
၈. ၃. ၂၀၁၉.