မီးလင်းဖိုများ

စတုတ္ထစက်မှုတော်လှန်ရေးဟာ
မင်းနဲ့ငါ့ကို နီးလျက်နဲ့ ဝေးကွာသွားစေတယ်

ဟော့ကင်းလည်း မကယ်နိုင်
ဘုရားလည်းမကယ်နိုင်

ကျောက်ခေတ်ကိုပြန်ရောက်မယ်ဆိုရင်
ဘယ်ရထားဖြစ်ဖြစ် ငါစီးရဲပါတယ်

အရင်လို အမဲလိုက်
အရင်လို သားရေဝတ်ရုံတွေခြုံ

ကိုယ့်ဂူနဲ့ကိုယ်
မီးဖိုကြမယ်လေ

ကျည်ဆန်ရထားနဲ့ ရုံးသွားမယ့်အစား
မြင်းတစ်ကောင်စီနဲ့ တောကစားထွက်ကြမယ်လေ

စမ်းရေကိုသောက်
ရေတံခွန်မှာ ရေချိုး
ဘာတန်ခိုးမှ မလိုချင်ပါ

ရန်သူ့ခြေသံ နားစွင့်ထား
လေးနဲ့မြားကို အသင့်ပြင်
လင့်စင်ပေါ်က စောင့်ကြမယ်လေ

အင်တာနက်ကော်နရှင်ကောင်းဖို့မလိုပါဘူး
မျက်စိလျင်ဖို့ပဲလိုတာပါ ။

ကြည်ဇော်အေး
7 march 20