သစ်ပင်လေးတစ်ပင်အကြောင်း

အစွဲအလမ်းမှာ ရင့်ရော်ဝါကျင်နေရတဲ့ သစ်ရွက်လေးပေါ့ကွာ
အချစ်ကို ဖျားယောင်းလို့ မလွယ်တော့တဲ့အခါ

သိမ်ငယ်မှုမှာ စိမ်းစိုဝေဖြာနေရတဲ့ အကိုင်းအခက်လေးပေါ့ကွာ
အချစ်ကို ဖျားယောင်းလို့ မလွယ်တော့တဲ့အခါ

လူသူမသိတဲ့သက်ပြင်းနဲ့ အမည်မဖော်လိုသူ ရေသောက်မြစ်လေးပေါ့ကွာ
အချစ်ကို ဖျားယောင်းလို့ မလွယ်တော့တဲ့အခါ

သစ္စာတရားမှန်ရင် ခြမစားဘူးရယ်လို့
ကိုယ့်ကိုကိုယ် သေကြောင်းကြံနေတဲ့ ပင်စည်လေးပေါ့ကွာ
အချစ်ကို ဖျားယောင်းလို့ မလွယ်တော့တဲ့အခါ

ခင်ဗျားတို့လည်း သိမှာပါ
အချစ်က ဖျားယောင်းရခက်တယ်
ကျွန်တော်က သစ်ပင်လေးတစ်ပင်
သူ့စိတ်နဲ့ ဝေတယ်
သူ့စိတ်နဲ့ ကြွေတယ်
အခုလည်း
ဖြတ်သွားဖြတ်လာ လေညှင်းလေးကို လူကြုံပါးနေရတဲ့ အကြောင်းအရာ
ခင်ဗျားတို့လည်း သိမှာပါ ။ ။

မိုးရင့်ကြယ်
၂၀၀၅ ၊ ဖေဖော်ဝါရီ