အရူးအမူး

နို့ဆီခွက်ကို လည်ပင်းမှာချိတ်ပြီး
သူ့အိမ်ရှေ့သွားထိုင်မိတယ်
လည်ပင်းမှာ ခြူကလေးဆွဲထားတဲ့
သူ့အချစ်တော်ခွေးလေးက
တချွင်ချွင်မြည်အောင် ဟောင်တယ်

လက်ညစ်ပတ်ကြီးနဲ့ ခူးလာတဲ့နှင်းဆီ
လူကြားသူကြားပေးမိတော့
မတန်မရာ
အသည်းမရှိတဲ့အတိုင်း
အရူးစကားဟာ ရယ်စရာဖြစ်လို့
သူ့မျက်စောင်းမှာ ပါးရှစ်စိပ်ကွဲလို့

အရူးဟာ မီးဝိုင်းတော့တာပဲ
လမ်းထိပ်အုတ်ခုံမှာ
တွေ့ကရာနံရံမှာ
မီးသွေးခဲနဲ့ အသည်းပုံတွေဆွဲလို့
မခင်နှင်းဆီ သီချင်းကို အကျယ်ကြီးအော်ဆိုလို့

အရူးဟာ နေမြင့်နေပြီ
စကားတွေ တယောက်တည်းပြော
နို့ဆီခွက်ထဲ နှင်းဆီကိုင်းခြောက်ကြီးထိုးစိုက်လို့
အခုပဲ ပွင့်လာတော့မယ့်အတိုင်း
တွေတွေကြီး ငေးနေလိုက်ပုံများ
တချွင်ချွင်မြည်တဲ့ခွေးကလေးတောင် အသံတွေပြာလို့ ။ ။

မိုးရင့်ကြယ်