ဆာမူရိုင်းသီချင်း

ငါ့မှာနားခိုစရာမရှိတဲ့အခါ ငါ့သတ္တိဟာ
ငါ့ရဲ့နားခိုရာဖြစ်တယ်။ ငါ့မှာညစာ
မရှိတဲ့အခါ ငါ့မျက်လုံးတွေနဲ့စားတယ်။

ငါ့မှာမျက်လုံးတွေမရှိတဲ့အခါ ငါနားထောင်တယ်။
ငါ့မှာနားတွေမရှိတဲ့အခါ ငါစဉ်းစားတယ်။
ငါ့မှာအတွေးတွေမရှိတော့ ငါစောင့်ဆိုင်းတာပေါ့။

ငါ့မှာဖခင်မရှိတဲ့အခါ ငါဟာသတိကို
ဖခင်အဖြစ်သတ်မှတ်တယ်။ ငါ့မှာမိခင်မရှိတဲ့အခါ
စည်းစနစ်ကို ငါဖက်တွယ်တယ်။

ငါ့မှာမိတ်ဆွေသူငယ်ချင်းမရှိတဲ့အခါ
တိတ်ဆိတ်ခြင်းကို ငါပေါင်းဖော်တယ်။ ငါ့မှာရန်သူ
မရှိတဲ့အခါ ငါ့ခန္ဓာကို ငါဆန့်ကျင်တယ်။

ငါ့မှာဝတ်ကျောင်းတော်မရှိတဲ့အခါ
ငါ့အသံဟာ ငါ့ကျောင်းတော်ရာ။ ဘုန်းကြီးမရှိပါ၊
ငါ့လျှာသာလျင် ဓမ္မတေးသံစုံသီကျူးရာ။

ငါ့မှာငွေကြေးမရှိတဲ့အခါ ကံတရားဟာ
ငါ့သုံးစွဲရာ။ ငါ့မှာဘာမျှမရှိတဲ့ အခါမှာတော့
သေခြင်းတရားသာ ငါ့စည်းစိမ်ဥစ္စာပေါ့။

လိုအပ်မှုဟာ ငါ့နည်းဗျူဟာ၊ဖယ်ခွာခြင်းဟာ
မဟာဗျူဟာ။ ငါ့မှာချစ်သူမရှိတဲ့အခါမှာတော့
အိပ်စက်ခြင်းကိုသာ ငါချစ်တေးသီတာပေါ့။ ။

ရောဘတ်ပင်းစကီး၏ Samurai Song (2000) ကိုပြန်ဆိုသည်။
ဘာသာပြန် - သူရိန်လင်း

မူရင်းကဗျာဆရာ၏ ကဗျာရွတ်ဆိုမှုအား ဤနေရာတွင် ကြည့်ပါ။