ရည်းစားစာ
မရွာလျှင် တိမ်ခိုး ရွာလျှင်မိုးပါ "မေ"...
ဒီစာကို ရေးလိုက်တဲ့နေ့ဟာ
"မင်းတို့ ဗမာပြည်ကို လွတ်လပ်ရေးပေးလိုက်ရင်
သွေးချောင်းစီးသွားမှာပေါ့ကွ " လို့
' ချာချီ ' က ပြောပြီး (၁ဝ) နှစ် မကြာခင်
တပြည်လုံး သွေးပင်လယ်ဝေခဲ့တဲ့နေ့ပေါ့...
"ပြည်တွင်းစစ်ကြီးရဲ့တရာခံဟာ ကျုပ်ပါဘဲဗျ " လို့
ငိုကြီးချက်မ ဖြောင့်ချက်ပေးပြီး အနှစ်(၂ဝ) အကြာမှာ
မ.ဆ.လ ပါတီဝင်ဘို့ သခင်စိုးကြီး လျှောက်လွှာတင်လိုက်တဲ့နေ့ပေါ့...
ဖာနိုင်ငံဖြစ်ပြီး အနှစ် (၃ဝ) အကြာမှာ
လက္ခဏာရေး သုံးပါးကိုသာ ငါနားလည်ခဲ့ရင်
ဒီအလုပ်တွေ ငါမလုပ်ခဲ့ပါဘူးကွာတဲ့
ဦးနေဝင်းရဲ့တရားသံဝေနေ့တနေ့ပေါ့
သမဂ္ဂကိုဖောက်ခွဲပြီး (၂၅) နှစ်အကြာမှာ
ညဘက်တိုင်ဖုံးကြားက 'ရကွိုင်းလက်ဂန်း' နဲ့ ဗိုလ်နေဝင်းကထွက်လာ
ဘယ်ဘက်တိုင်ဖုံးကြားက 'ဒိုင်းနမိုက်' နဲ့ ဗိုလ်အောင်ကြီးကထွက်အလာ
သမိုင်းဟာ
သူ့ဗီလိန်ခန်းဇာတ်ရုပ်အတွက်
ခွင်ချလို့မရနိုင်သေးတဲ့ နေ့တနေ့ပေါ့...
လီနင်ရုပ်တုကို ဖြိုချလိုက်တဲ့နေ့မှာဘဲ
'ဗိုလ်ချုပ်' ဓါတ်ပုံဟာ
၅(ည) နိုင်ငံရေးသမားတယောက်ကိုထောင်ချဖို့
လုံလောက်တဲ့သက်သေခံပစ္စည်းတခုဖြစ်သွားတဲ့နေ့ပေါ့
စစ်အေးခေတ်ဟာကမ္ဘာကြီးတခုလုံးအတွက် ပြီးဆုံးသွားတဲ့နေ့မှာဘဲ
ဘာလင်တံတိုင်းဟာ
နိုင်ငံလေးတခုအပေါ် ပြိုကျခဲ့တဲ့ နေ့တနေ့ပေါ့..
အနှစ် (၂ဝဝ) အကြာမှာ
ရခိုင်ကို ဒုတိယအကြိမ်လုပ်ကြံဘို့
အယ်ဂျာဇီးယားကိုအဖော်ခေါ်လာတဲ့ Newyork Times သတင်းစာရဲ့နေ့တနေ့ပေါ့
ဗိုလ်အောင်ဆန်းလို သူရဲကောင်းတွေမွေးထုတ်ဖို့
ဗိုလ်အောင်ဆန်းတို့ရဲ့တော်လှန်ရေးမျိုးကိုထပ်ပြီးဖြတ်သန်းဖို့ လို့တယ်လို့
ရယ်ဒီကယ်သမားတယောက်က နာနာကျင်ကျင် တွေးမိနေတဲ့နေပေါ့
ဒီလိုနေ့မျိုးမှာမှ
ချစ်ခွင့်ပန်ရခြင်းအတွက် ရှက်လည်းရှက်မိပါရဲ့ မေရယ်
ခုလို - လက်ကျဲကြီးကာလ
ခုလို - နင်းကျိုးနင်းကျွံကာလကြီးမှာ
ငါတို့ လည်ပင်းဖက်ငိုနေလို့ဖြစ်မလား
ငါတို့လက်မြဲမြဲတွဲကြရမှာ မဟုတ်လား
ဒီစာဟာ တို့တတွေ နှစ်တရာတိုင်တိုင် တွဲဆက်ဘို့
မင်းဆီ ကမ်းလိုက်တဲ့ လက်တဖက်ပါ "မေ" ... ။
ကိုသန်းထွန်း
Labels: ကိုသန်းထွန်း
posted by D Wathone Khat @ February 18, 2018
0 Comments
0 Comments:
Post a Comment
Subscribe to Post Comments [Atom]
<< Home