ဆက်သွယ်ရေးလျှို့ဝှက်ချက်

စစ်ကြီးရဲ့အနိုင်အရှုံးကို
သချာၤပညာက တွက်ချက်ပေးတယ်
သမိုင်းက မှတ်တမ်းတင်ပေးတယ်

ကတုတ်ကျင်းထဲမှာ
ပက်လက်လန်နေတဲ့ မြေပုံ

မြေမြုပ်မိုင်းကိုဖုံးဖိထားတဲ့သစ်ရွက်ကြွေဟာ
မျက်ဖြူလန်နေတဲ့ အချစ်

နှင်းတောထဲ လမ်းပျောက်နေတဲ့ ဝံပုလွေက
စားစရာရှာသလိုလေ
တွေ့ကရာအသက် ဆွဲဖြဲပစ်တယ်

ဝေလငါးအစား
ရေနံအစားထိုးလို့ရပြီ

ယမ်းမှုန့်အစား
အက်တမ်အစားထိုးလို့ရပြီ

မင်းမဲ့ဝါဒီတစ်ယောက်ရဲ့
ရွှေပြည်တော်ဆီ မှန်းဆရင်း

နယူတန်က
" ကျွန်တော့်ကိုခွင့်လွှတ်ပါ " တဲ့

အိုင်းစတိုင်းက
" ဂယ်လီလီယိုဟာ
ကပ်ပလာရဲ့ အလုပ်ကို
အသိအမှတ်မပြုခဲ့ခြင်းအတွက် ဒို့များနာကျင်ရတယ် " တဲ့

ရူပဗေဒသီအိုရီတွေက
ကဗျာမရေးခဲ့တာပဲ တော်သေးရဲ့

ပန်းသီးရဲ့ပိုးကိုက်ထားတဲ့အခြမ်းကို
စတိဗ်ဂျော့က လှီးထုတ်ပစ်ခဲ့လို့ပဲ တော်သေးရဲ့

မင်းနဲ့ငါဆက်သွယ်ရေးဌာနမှာ
ကိုယ့်အလုပ်ကိုယ်လုပ်နေကြရတယ်။

ကြည်ဇော်အေး
4 march 20