ရယ်ရတာတွေများတော့ ကိုယ့်မှာ လူပိုငှားပြီး ရယ်ရ

လူပေါတွေနဲ့ ဆိုသလေ့လေး ဆိုတာကို
ရယ်ရတော့ ရယ်ရတာ နည်းနည်းစိတ်ပိန်ပါတယ်
အတင်းအဖျင်းတွေနဲ့ သတင်းကမွှေးတော့
ရယ်ရတာ နည်းနည်းတော့ စိတ်ခုပါတယ်
ဒီတလိုင်း ဒီတကြောင်းက လွဲရင် ကျန်တာ မရဘူးလားဆိုလို့
ကိုယ့်မှာ ရယ်ရပါတယ်
ဟားတိုက်ရယ်ရခြင်း ဆိုတာ ဘုရားဟောထဲမှာလည်း မပါသလို
မနေ့က ထည့်ခဲ့တဲ့ အသက်ထဲမှာလည်း မပါပါဘူး
သို့သော် ကျွန်ုပ်တို့သည် ရယ်ရပါတယ်
ကိုယ့်ရှေ့က လူက ပုဆိုးအပေါက်နဲ့ဆိုတော့
ကိုယ့်နောက်က လူက ပုဆိုးအပေါက်နဲ့ပဲဆိုတော့
ကျနော့်ခမျာ အဝေးကို ရှောင်ပြေးရင်း ရယ်နေရပါတယ်
ကိုယ့်နာမည်ကို အော်ခေါ်တာက အစ
စဉ်းနီတုံးပေါ်တင်လိုက်တော့မယ့် ဦးနှောဏ်များ အဆုံး ရယ်ရပါတယ်
ရယ်စရာတွေ ကုန်သွားခဲ့ရင် ငါ ဆက်ဟားတိုက်နေပါဦးမယ်
ရယ်စရာဆိုတာ လေရှိသရွေ့ ကုန်ကူးကြတာဆိုတော့
ငါ ဟားတိုက်ပြီး ရယ်နေဦးမယ်
ဆက်၍ ဆက်၍ မင်းတို့အကြောင်းကို အရက်နဲ့မြည်းပြီး ငါဟားတိုက်ရယ်နေမယ်

ဒီဝသုန်ခက်