လူဝီ ၁၃

ပြတင်းပေါက် နှစ်ရာကျော်ရှိတဲ့ နွေရာသီစံအိမ်ရဲ့
မြေအောက်ခန်းထဲက ဝိုင်တစ်ပုလင်းဟာ
ပိုးမျှင်တွေအထပ်ထပ်

စမ်းချောင်းကလေးဟာ
ကျောက်ဆူးချထားတယ်

ဝီစကီတွေ ငါအကုန်သောက်ပြီးပြီ
အသားကင်တွေ ငါအကုန်စားပြီးပြီ

ဆေးရုံတွေ အကြိမ်ကြိမ်
အနီကဒ်တွေ အခါခါ

ရွှေတံဆိပ်တွေ အကြိမ်ကြိမ်
လက်ချည်းဗလာ အခါခါ

သွေးသားဟာ
အပြာကားတစ်ကားလို လူကြိုက်များတယ်
နိုင်ငံတော်အလံလို လူကြိုက်နည်းတယ်

ခွေးသားစားဖူးရုံ
မသာအိမ်မှာ ဖဲလိမ်ရိုက်ဖူးရုံလာက်နဲ့တော့
လူမိုက်ဘွဲ့မခံချင်ပါနဲ့လေ

ငါ့သတ္ထုတွင်းထဲမှာ
အလုပ်သမားတွေ နေ့စဉ်သေနေကြတယ်

ပြောချင်တာက
"မင်းသူ့ကိုချစ်နေမိပြီလားနှင့် အခြားသောကဗျာများ"
ဖတ်ပြီးပြီလား

ဒီထက်ပိုနက်တဲ့
မိုက်တွင်း
ရှိသေးလို့လား ။

ကြည်ဇော်အေး
29  feb  2020