နတ်သမီးပေးတဲ့အိပ်မက် ၅၅၇

များပြားလှတဲ့ လူတွေကြားထဲမှာ
ငါတို့ဟာ တစ်ယောက်ကိုတစ်ယောက် တွေ့မြင်နိုင်ကြတယ်
တစ်ယောက်ဆီကို တစ်ယောက်
များပြားလှတဲ့ လူတွေကိုကျော်ဖြတ်ပြီး လာနေခဲ့တယ်
အမြဲတမ်းပါပဲ ငါတို့ဘေးမှာ
ငါတို့နဲ့မသက်ဆိုင်တဲ့ လူတွေဟာ ရှိနေခဲ့ကြတယ်
အမြဲတမ်းပဲ ငါတို့ဟာ
ငါတို့နဲ့မသက်ဆိုင်တဲ့ လူတွေကြားထဲ ရှိနေခဲ့ကြတယ်
ဒါကြောင့် ငါတို့ဟာ ငါတို့လက်တွေ
ဆုပ်ကိုင်နိုင်မဲ့ နေရာကို ရှာခဲ့ကြတယ်
တစ်ခါတလေ အနီးကပ်ဆုံးနေရာကို
ရောက်ခဲ့တောင် ငါတို့လက်တွေ မဆုပ်ကိုင်နိုင်ခဲ့ဘူး
ဒါပေမဲ့ လူတွေဟာ ငါတို့အကြည့်တွေကို
မတားဆီးနိုင်ခဲ့တော့ ငါတို့ဟာ တစ်ယောက်မျက်လုံးထဲ
တစ်ယောက်ထည့်ပြီး သယ်ဆောင်နိုင်ခဲ့ကြတယ်
များပြားလှတဲ့ လူတွေကို ပျောက်ကွယ်သွားအောင်
လည်း ငါတို့ဟာ မတတ်နိုင်ခဲ့တော့
များပြားလှတဲ့ လူတွေကြားထဲမှာပဲ ငါတို့ဟာ
အမြဲတစ်ယောက်ကိုတစ်ယောက် ရှာဖွေနေခဲ့ရတယ်

ပိုင်